Alle skulane i Alver kommune har ein fast helsesjukepleiar. Oppgåvene til helsesjukepleiar er å følgje opp eleven si psykososiale helse, i tillegg til å jobbe helsefremjande og sjukdomsførebyggjande. I tillegg skal helsesjukepleiar vere ein ressursperson/rettleiar for føresette og dei tilsette i arbeidet med elevane. Helsesjukepleiar kallar inn enkeltelevar etter behov, tidlegare funn eller avtalar. Føresette blir i utgangspunktet informert om dette på førehand.

I skulehelsetenesta ynskjer ein å ta tak i problema i ein tidleg fase, då dei gjerne er lettare å løyse då. For å få til dette, er ein avhengig av eit godt samarbeid med føresette og med skulen. Helsesjukepleiar har og eit nært samarbeid med anna fagpersonell innan helsesektoren. Ved å ta kontakt med helsesjukepleiar kan ein såleis få hjelp og rettleiing på ein effektiv og rask måte. Helsesjukepleiar har teieplikt. Informasjon blir ikkje formidla vidare til andre instanser utan at føresette har godkjend det. 

I løpet av året vert det undervisning på ulike trinn. Grunna fagdagar, vaksinering og samtalar med alle førsteklassingane på Sagstad, vert det nokre dagar helsesjukepleiar ikkje er tilstades på skulen.

Det er fint om føresette har låg terskel for å ta kontakt.