I dag har vi markert SFO-dagen, og vi var veldig heldige med vêret! Vi valde å ha aktivitetar i valfrie grupper, både ute og inne, og hadde ein herleg dag på tvers av ulike stasjonar. Barna fekk velje mellom fleire spennande aktivitetar: slåball, fotball, leik i skogen med quizspørsmål dei skulle svare på, sløyd, kreativ leik i formingsrommet der dei kunne lage noko, teikne eller bruke modellkitt. I tillegg var det morosam leik på leikerommet, der barna kunne vere legar, veterinærar eller tannlegar i rolleleik.
Nokre barn valde å vere på same stasjon heile dagen, medan andre gjekk rundt og prøvde ulike aktivitetar. Det var ein veldig fin og energisk dag, og barna kosa seg med å kunne velje kva leik dei ville delta i.
I rammeplanen for SFO står det: «SFO skal leggje til rette for leik som engasjerer og inspirerer barna til aktivitet, og som kan bidra til allsidig utvikling og læring.» I vårt daglege arbeid på SFO er vi opptatt av korleis vi kan skape ein meir innhaldsrik kvardag for barna, slik at det ikkje berre er ein plass dei oppheld seg, men ein stad som stimulerer deira utvikling på fleire område.
Ein dag som i dag gir oss mykje inspirasjon til å finne gode løysingar for å skape ein leikfull og meiningsfull kvardag. Det er utruleg inspirerande å sjå barna engasjere seg i ulike aktivitetar, og det minner oss på kor viktig leik er for deira trivsel og utvikling.
Vi ser fram til fleire dagar fylte med leik, læring og latter!